سؤال بيقابلنى كتير فى الاستشارات والجلسات ... ازاى أتغير ؟ فى البوست ده هجاوب على السؤال بشكل بسيط فى خطوات عملية. الأول لازم تعرف انك عشان تتغير لازم تبذل شوية مجهود. لما حد بيقدملك هدية لازم تمد ايدك عشان تاخدها، كمان التغيير محتاج انك تبذل مجهود وتخرج من منطقة الراحة بتاعتك مفيش حد بيتغير وهو قاعد في مكانه.
محتاج ايه عشان تتغير؟
عشان تتغير لازم يكون عندك أدوات :
أولاً :الرغبة في التغيير.
لازم يكون عندك الرغبة الداخلية واحتياج حقيقي للشئ اللي انت عايز تتغير عشانه والاحتياج ده بيكون حاجة من اتنين احتياج انك تحصل على الشئ ده او أنك عايز تتخلص منه ، واسأل نفسك عايز تتغير ليه ؟ وحتوصل للتغيير ده ازاي؟ ايه النتيجة اللي هتحصل عليها بعد التغيير؟
ثانياً : التخطيط.
لما هنخطط لرحلة التغيير هيكون الطريق واضح ادامك وعارف انت رايح فين وازاي وده هيسهل عليك الرحلة .
ثالثاً : الممارسة والبدء في الطريق.
ابدأ خطوة خطوة وخلي عندك رقابة داخلية من نفسك وحمس نفسك بأنك دايماً تفكر في النتيجة بعد التغيير اختار حد من اللي حواليك تتوافر فيه صفتين .
أنه يكون بيحبك بجد
أن رأيه فيك يهمك
الشخص ده وظيفته يكون رقيب عليك في رحلة التغيير يشجعك لما تقف وياخد بايدك وممكن يديك افكار كمان بس خلي بالك لازم تكون متاكد انه بيحبك .
رابعاً : الصبر.
تحلى بالصبر ومتستعجلش النتائج لأنك لو استعجلت هتتوتر وممكن توقف رحلتك وتمل.
خامساً : بعد التغيير كافئ نفسك .
مكافئة النفس عامل أساسي ومحفز للتغيير أنا شخصياً محستش بأهمية مكافئة النفس إلا لما جربت ومش لازم المكافئة تكون مكلفة ممكن شيكولاته أو وردة يعني أي حاجة بسيطة تبسطك
جرب الخطوات وابدأ ومفيش حاجة هتوقفك بعد كده باذن الله
ودمتم في سعادة